Arribamos en la metat d’a temporada con una entrevista a la multipremiada Lucía López, la muller que i hai dezaga d’o prochecto de comunicación sobre agroecolochía Mallata. Tendremos tamién un nuevo relato d’a man d’un conoixiu escritor y cantaire d’indie-pop y dos cancions de dos bandas que presentarán discos en istos meses.
Tierra de Barrenaus 8×07 Especial Comics 2021 Aviento ye, en Zaragoza, lo mes d’o comic. Los dias 17, 18 y 19 se celebra en la ciudat lo Salón d’o Comic, una cita anyal que torna dimpués d’haber-se de supender por la pasa, y que arrocla autoras, editorials, librerías, aficionadas y toda mena de personas chuntas por la pasión por iste arte.En Tierra de barrenaus ya ye tradición adedicar, en istas calendatas, un programa a los tebeos. En ista temporada recibimos una patacada de recomendacions pa leyer de man de colaboradoras, oyents y amigas d’o programa.
Pa rematar la temporada me torno a chuntar con Ruben y Dabi pa fer una nueva edición de “Temazos”. Chugando una partida de guinyote, charramos de mosica y tos proposamos quantos temas pa pasar istos días de caloraza. Como de cutio con somardería y en iste caso, con tres cerols.
Los zaguers acontecimientos en la muga de Ceuta han feito reviscolar lo debat arredol d’o Sahara Occidental. La tensión entre los gubiernos espanyol y marroquí ha puyau dimpués de que s’acullise a lo lider d’o frent polisario pa tractar-le la covid. Charramos con Chorche Paniello, historico activista en desfensa d’o pueblo saharaui, qui nos da las claus d’iste conflicto.En l’apartau mosical, ascuitaremos a un cantaire que nos va deixar fa poco y que tenió una gran y larga trachectoria. Tamién sentiremos a una colla que, en un d’os suyos discos mas famosos, decidió versionar en euskera, catalán y gallego lo primer single.
En 2009 Barricada publicó un d’os suyos zaguers treballos: La tierra está sorda. Facioron d’ixe nuevo prochecto un album conceptual centrau en la Guerra civil espanyola. Deciueito temas que charran de muitas d’as historias que i sucedioron. Beluna bien conoixida y atras no pas tanto. Mario nos charra d’iste disco y d’os sucesos que inspiroron cada una d’as suyas cancions. Antimás, respondo a bell oyent que preguntaba en retz socials por la vichencia d’a conoixida como Lei d’o LAPAPYP, legalment la Ley de uso, protección y promoción de las lenguas y modalidades lingüísticas propias de Aragón.
Ni la pasa puet aturar la creatividat d’as mosicas y los mosicos aragoneses que, un anyo mas, han quiesto aduyar a la supervivencia y difusión d’a luenga aragonesa colaborando con lo prochecto O Zaguer Chilo. Cherardo nos presienta la quarta edición d’iste disco que replega lo treballo de vinte collas que han grabau un tema en aragonés. Con ista, ya son 80 nuevas cancions que cantar en la nuestra luenga.En la segunda parte conoixeremos las barucas d’un cociner y de Sant Pasqual Bailón, lo suyo santo favorito que responde, u no pas, a los suyos rezos.En la parte mosical charraremos, prou que sí, de Pablo Hasel, y ficaremos una nueva canción en unatra luenga en lo calaixo de cancions.
En 1591, Aragón se rebeló contra lo rei Felipe II. Las conseqüencias estioron grieus. Chuan de Lanuza, lo mozo, Chusticia d’Aragón y muitos atros liders d’a rebelión estioron executaus y las leis aragonesas cambiadas pa que la monarquía tenese mas control sobre las institucions nuestras. Mas de quatre sieglos dimpués, Aragón pierde por cada día mas la suya identidat, personalidat y cultura propia. La mosica, como parte d’ixa cultura, nos convida a soben a tener present la tierra y la chent que i vive. Muitas cancions con clamamientos a no deixar perder lo nombre d’Aragón en los llibros d’historia, y hue, tos ne trayemos quantas pa proposar-tos una nueva rebelión aragonesa
En iste aviento trobamos muito a faltar lo Salón d’o comic de Zaragoza. Tot y que bell acto sí que s’ha salvau, lo mes d’o comic se queda bien radiu por motivos evidents, asinas que en Tierra de barrenaus prebamos de que no s’ixuplide que iste ye lo mes d’as aficionadas a iste arte. Charramos con Elena, qui nos recomienda tres comics protagonizaus por bad-ass girls. En la segunda parte nos visita Fernando, l’autor de The Black Sheep, un comic dichital en aragonés publicau en Faneo.Y antimás, dos nuevos temas mosicals: un que remera a una d’as collas mas miticas d’a Zaragoza d’os 90 y unatro d’una banda que, tot y cantar en castellano de cutio, decidió de fer una canción en euskera. ¿Endevinas qual?
Ya que no podemos salir d’o termin municipal, aproveitemos pa conoixer-lo. Zaragoza ye una ciudat bien gran que antimás ha absorbiu qualques lugars d’a suya redolada. Contamos con tres rius y con diferents y repolius ecosistemas que sorprenden a-saber-lo. La educadora ambiental Tamara Marzo Rins torna a visitar-nos pa charrar-nos-ne y proposar-nos rutas caminando y en bici por la nuestra ciudat.En la segunda parte tos parlaré d’o reto Inktober a on que he tornau a participar con 31 nuevas historias, que tos ne leyeré una. 31 nuevos relatos en aragonés que se suman a los de l’anyo pasau y que puetz leyer de baldes en lo blog.Tendremos antimás un nuevo calaixo de cancions con una nueva categoría y en la canción d’o programa lo nuevo d’un d’os mios mosicos favoritos que mete mosica a una cinta sobre l’asesinato de Guillem Agulló
