Por quartena anyada, a Radio Libre zaragozana Radio Topo organiza a emisión especial “D’estrela a estrela” Una anyada más l’aragonés, y en menor mida o catalán, todas dos luengas propias d’Aragón, se ferán servir como luengas de comunicación en as más de 17 horas d’emisión.
L’orichen d’istas emisions, unicas en tot Aragón, naixió en 2011 como conmemoración d’a sinya d’a Carta Europeya d’as Luengas Minoritarias. China-chana a emisión ha iu creixendo y, en ista quartena edición y como principal novedat, s’emitirá mientras tot un cabo de semana. En concreto serán os venients 8 y 9 de noviembre. “D’estrela a estrela” podrá escuitar-se en o 101.8 d’a FM zaragozana u por internet, dende a pachina web de Radio Topo
Debutarán en iste “D’estrela a estrela” os programas Dos Caras y una Cruz, Antena Dislocada, Con la casa en la Mochila, EstrellaDos y El JazzBass. Repiten Rueda Libre, A Liedrera, L’Acrataire y Lucha Libre; y os programas mosicals Skándalo en las ondas, Ciutat Podrida, Rocktubernio y Electrokrazia. Prou que Fendo Orella, o programa en aragonés de Radio Topo que tornó a las emisions fa bellas semanas, bi participará una anyada más. Ta tractar l’actualidat, bi habrá especials tematicos sobre o situación d’o Kurdistán y cobertura d’a chornada d’o 9N2014 en Catalunya. Destacar que igual como en pasadas edicions, bi participarán atras Radios Libres d’a ciudat, en concreto a emisión contará con un especial d’una hora de Radio La Granja y d’atra mán, con Mosica y Parolas de Radio MAI.
T’o sabado 8 y arredol d’a emisión, s’han organizau qualques actividatz difuera de l’ambito d’a radio ta que a chent que quiera pueda acercar-se-ie. A primera ye un un socalce en La Vía Láctea (C/ Dr. Palomar 25) que prencipiará a las 12 horas con mosica d’o programa Electrokrazia y contará con a gravación en directo d’o programa EstrellaDos. A segunda, ya de de nueitz, ye un concierto con as collas 13 Krauss y Ezinean a partir d’as 20 horas en l’Arrebato (C/ Palafox 28) y posterior fiesta con punchadiscos d’a propia radio.
O cartel d’ista edición ye obra de l’artista aragonés Rubén Hervás y represienta con a ilustración d’un corazón que l’aragonés, a luenga en mayor risgo de desapareixer de toda Europa seguntes a UNESCO, encara ye una luenga viva.