Tarde, pero ha arribau. Ya i hai autoridat lingüistica pa l’aragonés, nombrada por las institucions, plural, diversa y representativa. Naixe d’una mala lei, como lo propio Director Cheneral de Politica Lingüistica escribiba en iste articlo chusto antes d’empecipiar a desarrollar-la. Naixe inexplicablement tarde, ya que habría d’haber estau una d’as prioridatz d’a Dirección Cheneral, mas quan los nombramientos de Cortz y Universidat yeran feitos fa a-saber-lo. Pero lo important agora ye que ye naixida. Ye momento de seguir treballando mirando-nos entabant.
Lo pasau 15 de noviembre, en lo Paraninfo d’a Universidat, prenioron posesión d’os suyos cargos Javier Giralt, como president de l’Academia y Director de l’Instituto Aragonés d’o Catalán y Anchel Conte, como director de l’Instituto de l’Aragonés. Serán dos entidatz con fayenas de tot diferents debant d’a situación tant distinta de todas dos luengas. La primer d’ixas fayenas, en lo caso de l’aragonés, y como ya anucioron tanto en prensa como en lo propio acto de posesión, será creyar, a la fin, una grafía oficial pa la nuestra luenga.
Bellas quantas personas estiemos en ixe momento historico, presenciando un acto con a-saber-la institucionalidat, como yera menester, pero tamién con muita emoción y mesmo bella purna d’espontaneidat de man de Tomás Bosque y La Chaminera. Aragón será somarda u no será. Tamara, Vero, Cherardo y yo nos chuntamos en un nuevo programa pa charrar sobre ixe acto y las asperanzas que tenemos en que la fayena d’istos nuevos organismos faiga firme honra pa lo futuro d’as nuestras luengas. Tienen por debant un treballo furo y dificil, a on que habrán de concarar-se con muita chent d’adintro y difuera d’o mundet nuestro. ¡Suerte! L’aragonés y lo catalán l’aprecisan.
Si te lo perdiés, puetz veyer en Youtube lo video completo de l’acto con todas las comunicacions que en charramos en lo programa.
Podcast: Reproducir en una nueva ventana | Descargar
Suscríbete: RSS
